الشفوى وسنينه الجزء الثانى

مش عارف اذا كان الجزء الاول عجبكو ولا لأ بس انا حأكمل برضه .... دكاتره الطب النفسى بيقولوا انى ده محاوله داخليه للتطهير .. يعنى الواحد لازم يطلع كل الكلاكيع اللى جواه وطبعا بعد 4 سنين من امتحانات الشفوى لازم الواحد يطهر نفسه ..اه كان فيه طبعا محاولات تانيه زى حرق كتب الكليه بعد كل امتحان او على الاقل رمى الورق بعد الامتحان( ملحوظه: اى حد كان طالب فى صيدليه يعرف ان الكليه بعد كل امتحان بتبقى زى الخرابه .. الورق مرمى فى كل حته مفيش حد بيرجع اى ورقه معاه البيت )
المهم انهارده حأقول بعض النصايح والامثال اللى لازم اى طالب يلتزم بيها ( ان كان عايز ميهزأش نفسه فى الشفوى):
1- اوعى تخش مع اى حد مستواه اعلى منك
والنصيحه ده مش حتقدر تنفذه الا من تانى سنه بعد مبيكون المستويات كلها اتعرفت .... طبعا كنت انا النحس الوحيد اللى عرفت قيمه النصيحه ده من بعد اول ترم مش من اول سنه طبعا كان فيه بعد الخسائر لكن الانسان الشاطر هو اللى يحاول يقلل الخسائر ده....
مشهد (1) نهار-داخلى ... دكتوره الماده تجلس وامامها 4 طلبه انا احدهم
الدكتوره للطالب الاول: قولى حاجه فيها fixed oil
الطالب: احنا درسنا اربع حاجات وهى
ويجاوب الطالب اجابه تنفع تتدرس
تنظر الدكتوره للطالب التالى ( اللى هو انا) وتقول : طب قولى بنستخدمهم فى ايه ؟؟؟
انا : بنستخدمهم فى...فى...فى...
الدكتوره للطالب التالى: تعرف انت؟؟؟
الطالب: ايوه... ويجاوب اجابه معرفش ان كانت صح ولا لأ بس من انبساط الدكتوره يظهر انه صح
ويظل الامر مستمر لنصف ساعه..... هم يجاوبوا وانا قاعد برفان مش حأقول انى مكنتش مذاكر لا كنت مذاكر الماده كلها او على الاقل كنت فاكر كده
مشهد (2) امام اللجنه ..انا ومعى الطالب الرابع
انا: والله حرام الدكتوره زمانها ادتنى صفر
الطالب : انا اللى غلطان ...كنت عارف ان الاول على الدفعه داخل ايه اللى يخلينى ادخل معاه
انا: اهى عظه للمستقبل؟؟ وبعدين انا نفسى اعرف بيعرفوا الاوائل ازى واحنا امتحنا ترم واحد يعنى الكليه لسه منزلتش الترتيب
الطالب : اهو بيلموا بعض وكل واحد بيقول درجاته وبتتعرف
انا: طب مهو ده زميلى فى السكشن ومع كده مكنتش اعرف.. اه صحيح وانت عرفت منين؟؟؟؟
الطالب : اه مأنا طالع ال12 وربنا يسهل ممكن ا...
طبعا سيبته يكمل وده كانت اخر مره اخش معاهم .. اه وحاجه كمان دلوقت بس عرفت ليه محدش كان عايز يخش معاهم مع ان الطلبه كانوا ياما امام اللجنه
وده نصيحه تانيه لو لقيت اللجنه بتدلل على نفر يخش والعامل واقف زى المنادى فى اى موقف بينادى لجنه .. واحد لجنه... واحد .. واحد وطالعين ... واحد .... فخد بالك اوعى تكون الواحد ده...................


2- القرش الابيض ينفع لليوم الاسود.. او ... اللى مش حتعوز وشه انهارده حتحتاج قفاه بكره
المثل ده حتعرف قيمته مع العمال فى الكليه .. اوعى تزعل اى عامل..ولازم تظبط العمال كلهم .. وكلهم بتتعامل معاهم طول السنه فى السكاش بالذات يعنى .. يعنى لو لقيت فى اى يوم الصندوق الكارتون اياه محطوط فى اى مناسبه ( من اول الاعياد الرسميه لعيد العمال لحد الامتحانات) اوعى تسأل المناسبه ايه ؟؟ حط الفلوس وانت مبتسم وقول اى حاجه تعرفهم انك دفعت وكمان ظبط العمال الرجاله سجاير بس اوعى تكون كوكو الضعيف الا العمال يحتقروك
..انا اعرف واحد فيهم مكنش بيشرب الا المستورد عشان السيكوتين طبعا....اه ولو لك صرفه مع الصيدليات وتقدر تجيب اى عينات يبقى فل ولو انت فنجرى ممكن تشترى على خفيف وطبعا انت عارف كويس حتجيب ايه
ولو فى يوم لقيت اى عامل جارر وراه اى طالب وداخل بيه لجنه طريه وانت واقف زى البرص محدش معبرك اعرف كويس ان ده غلطتك وان انت اللى مظبتش حالك

تسلم علي النصائح انا كنت فاكره كليه الصيدله غير كده خالص كويس انك نورتني مشكوررررررر