الشفوى وسنينه الجزء الاول

االسلام عليكم يا شباب
اولا انا ضيف جديد عليكم
واحب اشارك معاكم مشاركه صغيره كده
طبعا مستنينى اقول نكته ولازم تكون جديده , يعنى لازم تضحكوا بس انا مش حأقول المره ده نكته بس حأحكى عن حكايه حصلت معايا
(اى تشابه بين القصه ده وبين اللى حصل واللى بيحصل للطلبه فى كليه صيدليه هو تشابه مقصود )
طبعا الكل مستنى انى احكى قصه مألفه لكن والله الحاجات حصلت بجد
زى معرفتم انا كنت طالب فى كليه صيدله....حلم البالطو البيض والاحترام والبرستيج العالى ( طبعا كل ده حاجات حتنساها بعد كده عمرك محتشوف البالطو بعد متتخرج وحتتعامل مع اسوأ انواع البشر وحتاخد على قفاك من الكل السوبر فيزور لو شغال فى شركه صاحب الصيدليه لو شغال فى صيدليه اما لو عندك صيدليه فقدامك ليسته كبيره من اول ال......
طولت وخرجت عن الموضوع ....
المهم....

الشفوى هو بعبع اى طالب فى الكليه....واول قاعده الطلبه بيتعلموها ان الشفوى ده ارزاق يعنى الحظ هو العامل الاساسى
وفيه شويه قواعد حنتعلمها مع بعض من الحكايات ده
الحكايه الاولى:
المنظر : قاعه كبيره وهى قاعه المحاضرات الرئيسيه :
المشهد : الدكتور فلان وامامه حوالى 300 طالب

الدكتور _ موجها كلامه للطلبه_ : الطلبه اللى فى مجموعتى تيجى كده ( ويشاور ناحيه اليمين ) والطالبه اللى منش فى مجموعتى تيجى كده ( يشاور للناحيه الاخرى ) والطلبه اللى معاها وسايط تيجى فى النص
طبعا بما انك طالب جديد ومتعرفش حاجه عن الموضوع ده حتتخض لكن حتعرف بعد كده ان الدكتور ده نظامه كده كل اللى مش مذاكر بيخشله وطبعا كل اللىمعاه واسطه برضه بيخشله
وطبعا ده الدرس الاول اللى حتتعلمه فى الكليه ( اللى ملوش ظهر حياخد على قفاه ) وده طبعا تدريب عملى لمواجه المستقبل
والدرس التانى اللى حتتعلمه هو الصبر يعنى لو انت من الصنف التانى يعنى من بره المجموعه الدكتور مشكوراحيقعدك قدامه من 5الى 6 ساعات انت ونصيبك لان الدكتور بياخد الوسايط ومجموعته الاول ملحوظه : اقسم بالله انا ذاكرت فرع الدكتور ده فى الخمس ساعات اللى قعدتهم قدامه ....طبعا حتسألوا انا رحت له ليه ده له حكايه ظريفه قوى وهى ان الدكتور اللى مفروض امتحن عنده كان من القاهره وطبعا كان حاجز فى القطر ويدوب خلص ربع المجموعه بتاعته اللى هى حوالى 30 راس وجه معاد الغدا ( والغدا ده له حكايه تانيه بعدين اقولها) وهوب نستنى الدكتور مفيش دكتور وبعد ساعتين من البحث المتأنى لكافه ارجاء الكليه من اول المدرجات للمعامل للحمامات افاد احد المصادر ان المذكور بين قوسين الدكتور شوهد لاخر مره مغادرا الكليه بصحبه رئيس القسم و بسؤال السالف ذكره تبين ان الدكتور المحترم سافر
والعمل
رئيس القسم : وزعوا نفسكم على الدكاتره
و طبعا احنا عارفين ان ده ممنوع ومفيش دكتور بيرضه ياخد طلبه اى دكتور تانى ( طبعا ماعدا الوسايط) لكن فى حالتنا ده العزر موجود والاذن معانا .... طب ايه اللى حصل.... سمعتم عن اللى حصل فى الدويقه الناس اللى عملت نفسها ساكنه هناك عشان تاخد شقق.... صوره طبق الاصل كل طالب فى اى مجموعه راح للدكتور اللى على مزاجه وعمل انه من مجموعتنا والضحيه طبعا كان احنا... الدكاتره الكويسه كلها عليها طوابير ولا طوابير العيش والدكاتره الصعبه بقت زى
اجوجو فى ماتش المحله مش لاقيه حد يعبرها( هو اجوجو نزل الماتش ده ولا لأ ..مش فاكر)
طبعا الدكاتره اتخنقوا مننا محدش رضى ياخد حد من بره مجموعته والنتيجه ان احناملقناش غير الدكتور اياه يمتحنا
والحمدلله على الساعه 10:30 باليل اى والله كنت خلاص ذاكرت فرع الدكتور ده وعرفت كل الاسئله اللى بيسألها ويدوب حأخش بعد مجموعتين جه رئيس القسم ونده على المجموعه اللى كانت عند الدكتور اللى سافر وقال حيمتحنا طبعا محدش قام
لكن الكتور التانى ( بتاع الوسايط ) حلف انه مش حيمتحن حد اسمه محمد يعنى مجموعتنا
ومضطرين قمنا ورحنا للدكتور
هذا وقد بلغنا بعد تلك الحادثه بأيام ان رئيس القسم قام بهذه الفعله لان ضميره وجعه لان هو اللى شجع الدكتور انه يسافر
لكن لم يتم التأكد من صحه تلك الشائعه
طولت عليكم عارف .... ويمكن البعض يقول ايه الرخامه ده لكن شر البليه مايضحك والحكايه لما يتعرف انها بجد مش نكته اكيد حتخليكوا تغيروا رأيكم
وفى الخر لازم نطلع ببعض الدروس المستفاده والمواعظ :
1_ الشفوى ده حظ عشان كده خلى والدتك تدعيلك يامه واوعى تزعلها ايام الامتحانات
2_ لازم تنسق مع زمايلك فى الجموعه وتحط مراقبه قويه على الدكتور بتاعك يعنى مش يقولك رايح الحمام..قصدى رايح اتغده ويهرب منك
3_ العمال بتوع الكليه عاملين شبكه تجسس حتحتاجها فى معرفه الامور الخفيه من اول الدكاتره حيتغدوا ايه ( عشان لو حبيت تسم الاكل وتريح الطلبه كلهم ) لحاد الدكتور ده نظامه ابه ( فى معلومات غير اكيده عن انهم بيضربوا كروت وسايط لكن لم يتم التأكد من تلك المعلومه )
4_ اهم درس لازم تتعلمه انك لازم تذاكر كويس عشان متقرفش نفسك وتقرفنا معاك ( بقالى 4 سنين نفسى اعمل الحكايه ده ومش عارف )
5_ اوعى تسأل الدكتور السؤال الأبدى بعد ميحط درجه الشفوى ( اللى بيخبيها اكنه بيخبى سر عسكرى) :هو انا كده حأنجح يا دكتور
ليجيبك هو بكل صدق وحب وحنان ابوى : طبعا يا حبيبى السنه الجايه ان شاء الله
6_ اخر درس واهم درس انك متخشش صيدله من اساسه الطب دلوقت لغوا فيه الشفوى
ا

حاسس بيك و الله
و حاسس انك بتتكلم عن د. عاصم ( لو انت في اسكندريه )
واهو كله نصيب
لي عوده معاك