عايز تخسى او تخس

السمنه هى احد اخطر أمراض العصر الحديث... والكل حلم حياته انه يصبح نحيف لكن كل المصابين بالسمنه بيسألوا نفسهم احنا ليه مبنخسش مع اننا عاملين نظام ريجيم قاسى جدا والاجابه على السؤال ده سهله جدا وهى اننا عشوائيين ومعنى العشوائيه هنا ان احنا بنستعمل اى نظام ريجيم بنسمع عنه بمعنى ( بنت خالتى استعملت ريجيم البروتين وخست عليه.... او...سمعت عن ريجيم الميه ده ممتاز جدا ناس كتير جربته... وخد بقى عندك ريجيم البطاطس ... ريجيم الصنف الواحد ده غير ريجيم القئ المحبب للبنات فى الغرب) وهى ده العشوائيه ان احنا بنقلد اى انظام لكن الصح ايه؟؟؟؟؟
اول حاجه لازم اسأل نفسى انا تخين ليه ؟؟؟ يعنى سبب السمنه ده ايه؟؟؟ والاسباب كتيره منها الخلل الهرمونى فى الغدد زى الغده الدرقيه أو ان معدل حرق الجسم للنشويات والسكريات ضعيف وده له أسبابه زى كسل ( ان جاز ان احنا نقول ) البنكرياس اما السبب اللى الناس كلها عرفاه وهو النظم الغذائى فبيجى فى اخر القائمه لكن خلينا نتفق ان هو ده السبب الرئيسى والاهم ..... وبكده لازم نعرف ان اى نظام أكل مع العلاج لازم يكون متفصل على الشخص .. يعنى النظام اللى ينفع مع فلان مينفعش مع التانى....لكن فيه قواعد عريضه ممكن نتبعها بشرط ان السمنه متكنش بسبب مرضى وده بعض القواعد العامه :
1- وجبات منخفضه السعرات : وده شى الكل عارفه لكن لازم ناجد بالنا ان فيه اشخاص جسمها بيزيد مع النشويات واشخاص أخرى بتزيد من الدهون وده الدكتور بيحدده ... وكمان لازم نعرف ان الجسم برضه محتاج للنشويات والدهون يعنى مينفعش أحرم نفسى حرمان تام منها وان شاء الله المره الجايه ححط بعض انواع الاكل والسعرات الخاصه بيها
2- الرياضه مهمه جدا بس مش عشان انك تخس لكن عشان تخلى جسمك يذود معدل الحرق ... والمقصود بالرياضه هنا مش الرياضه العنيفه لكن اى شى بسيط زى المشى او تمارين الصباح الخفيفه
3- حاول تحط قدامك صوره لشخص رشيق زى ممثله بتحبيها او لعيب كوره بتحبه وده حيكون حافز قوى ليك
4- لازم تعرف ان انت وزنك لم يزد فى يوم وبالتالى عمرك محتخس فى يوم ...الصبر ومتستعجليش
5- اياك او اياكى تستعمل نظام ريجيم قاسى لان ده له اضرار خطيره منها سقوط الاعضاء زى الكليه لان كل الاعضاء الداخليه محاطه بطبقه الدهون وده هى اللى بتحملها وتمنعها من التحرك من مكانها وده احيانا يسبب الام رهيبه وبالذات الكليه
وكمان فيه مشكله تانيه ملهاش حل وهى السليوليت اوال stretching market وده مصيبه تانيه حلها صعب
والاهم اننا لازم نعرف ان النظام الغذائى ده مش حاجه حنعملها لفتره وبعدين اما نخس حنسيبها لأ ده حيكون نظام لحياتنا حنستمر عليه على طول يعنى عمرى محقدر استمر على حرمان نفسى على طول
واخيرا لازم نعرف ان السمنه لها أخطار صحيه كتيره زى :
1- الدهون العاليه على الكبد وده ممكن تعمل تليف أو كسل للكبد
2- ترسب الدهون فى الشرايين يؤدى للجلطات وانسداد الشرايين ده غير الحمل الذائد على القلب
3- السمنه تذيد من مخاطر الاصابه بالسكر والضغط
4- الانيميا والبعض ممكن يفتكر ان ده مستحيل لكن ده صحيح والسبب هنا ان الانسان السمين متعود على نظام غذائى معين ممتلئ بالدهون والنشويات والحاجات ده بتمنع الجسم من الامتصاص الكامل للحديد من الغذاء
5- الصابه بخشونه المفاصل والالام بالعمود الفقرى
6- تكيس المبايض وده من اهم اسباب تأخر الانجاب
وبكده لازم نعرف ان الانسان لازم يخس مش بس عشان يبقى شكله حلو لكن برضه عشان صحته



وان شاء الله المره الجايه ممكن نتكلم عن الادويه الموجوده بالصيدليات للتخسيس والتى يجب الا نستعملها الا بحرص وتحت اشراف طبيب

مشكور علي هذا الموضوع الرائع وننتظر المزيد دكتور